اسلام آباد۔29جون (اے پی پی) قومی اسمبلی آئندے مالی سال 2021-22ء دی بجٹ تجویزاں کوں روبہ عمل کرݨ سانڳے فنانس بل 2021 ء دی کجھ ترمیم نال منظوری ݙے ݙتی اے۔ منگل کوں قومی اسمبلی اچ وزیر خزانہ شوکت فیاض احمد ترین تحریک پیش کیتی جو پہلی جولائی 2021 ء توں شروع تھیوݨ آلے سال سانڳے وفاقی حکومت دی مالیاتی تجویزاں کوں روبہ عمل کرݨ اتے کجھ قوانین اچ ترمیم کرݨ دا بل فنانس بل 2021ء تے فوری غور کیتا ونڄے۔ اپوزیشن ولوں ایں تحریک دی مخالفت کیتی ڳئی۔ اپوزیشن ارکان پہلی خواندگی تے بحث اچ وفاقی بجٹ کوں تنقید دا نشانہ بݨایا جئیں تے وزیر خزانہ شوکت ترین بحث نبڑیندیں ہوئیں آکھیا جو پاکستان دی چہتر سال دی تاریخ اچ ملک دے غریب طبقے دا اینویں خیال کائنی رکھیا ڳیا جینویں ایں بجٹ اچ رکھیا ڳئیے۔ اوندے بعد ڈپٹی سپیکر قاسم خان سوری فنانس بل 2021ء تے غور کرݨ سانڳے تحریک ایوان اچ پیش کیتی جئیں تے اپوزیشن دے رکن نواب یوسف تالپور مطالبہ کیتا جو بل تے رائے شماری ووٹنگ نال کرائی ونڄے۔ ڈپٹی سپیکر قاسم خان سوری واری واری حکومتی اتے اپوزیشن ارکان کوں آپݨی ڄاہ تے کھڑا تے گنتری کرائی جئیں دے نتیجے دے مطابق تحریک دے حق اچ 172 جڈانجو مخالفت اچ 138 ووٹ آئے۔ اینویں کثرت رائے نال بل تے غور کرݨ تے تحریک منظور کر ڳھدی ڳئی۔ سپیکر قومی اسمبلی اسد قیصر ایوان دی کرسی صدارت سنبھالی تاں انہاں بل دی مختلف شقاں کوں ہک ٻئے دے بعد ایوان اچ منظوری سانڳے پیش کیتا جئیں تے وزیر خزانہ شوکت ترین ولوں بل دی مختلف شقاں اچ ترمیم پیش کیتی ڳئی جنہاں کوں ایوان کثرت رائے نال منظور کر ڳھدا۔ ایں وچال عمران خان وی ایوان اچ آڳئے اتے انہاں دے آوݨ تے ارکان ڈٰیسک وڄا کراہیں انہاں دا خیر مقدم کیتا اتے وزیراعظم عمران خان دے حق اچ نعرے لاتے ۔خورشید احمد جونیجو، شازیہ صوبیہ، شاہدہ رحمانی، شگفتہ جمانی، حسین طارق، صلاح الدین، شاہدہ اختر علی، کمال الدین، جمال الدین، زاہد اکرم درانی، عائشہ غوث پاشا، قیصر احمد شیخ، محسن داوڑ اتے ٻئے ولوں پیش تھئی ترمیم ایوان کثرت رائے نال مسترد کر ݙتی۔ فرسٹ شیڈول، سیکنڈ شیڈول دی منظوری دے بعد وزیر خزانہ ترمیم تھیے مالی بل 2021ء ایوان اچ پیش کیتا جئیں دی ایوان کثرت رائے نال منظوری ݙے ݙتی۔
قومی اسمبلی آندے مالی سال 2021-22ء دی بجٹ تجویزاں کوں روبہ عمل کرݨ سانڳے فنانس بل 2021 ء دی کجھ ترمیم نال منظوری ݙے ݙتی
مضمون کا ماخذ : غالب افریقہ
متعلقہ مضامین
