تبدیلی دی راہ اچ رکاوٹ مافیز دا مقابلہ کر ݙکھیساں، بھاویں حکومت لڳی ونڄے اینآ ر او نہ ݙیساں، وزیراعظم عمران خان

اسلام آباد۔11مئی(اے پی پی)وزیراعظم عمران خان آکھیے جو ملکی معاشی حالت سدھردی پئی اے بھل مافیا تبدیلی اچ رکاوٹ اے، 30 سال تئیں ملک لٹݨ آلے ہتھ پیر مریندے پین، قوم نال تھیوے میں مافیاز دا مقابلہ کر ݙکھیساں، حکومت ویندی اے تاں ونڄے کہیں کوں وی این آر او نہ ݙیساں، پوراشریف ٹبر ٻاھرو ٻھج ڳئے ہݨ شہباز شریف وی نکلݨ دے چکر اچ اے، انہائیں دی وجہ توں ملک قرضیاں اچ ٻڈا پئے، جیکر انہاں کوں ݙر کائنی تاں ٻھجدے کیوں ودن اتے این آر او دی تانڳھ اچ ٻاھر کیوں ونڄ ٻیٹھن، عدالتاں آزاد ہین جتھاں ونڄ تے اے اپݨی پت ݙیون، وزیر خزانہ کوں مہانڳ دا رستہ ݙکݨ دا ٹاسک ݙتے، بھارت نال کشمیر دی حیثیت بحال کرݨ تئیں کوئی مذاکرات نہ کریسوں۔ اے ڳالھیں وزیراعظم عمران خان پی ٹی وی تے ” آپ کا وزیر اعظم آپ کے ساتھ” پروگرام اچ عوام دے براہ راست سوالاں دے جوابات ݙیندے آکھین۔ وزیراعظم عمران خان آکھیے جو قوم کرونا نال خوب لڑی اے بھل تریڄھی لھر خطرناک اے جیندے توں نکلم کیتے پورا زور اے، اللہ دا شکر اے جو حالی وی سافے حالات جق توں بہتر ہین، عوام عید تے خاص احتیاط ورتن، جیکر اسان ایس او پیز تے عمل کیتا تاں ایں وبا توں تیکھے نکل ویسوں، ملک اچ ویکیسن دی تیاری بارے تیکھے قوم کون خوشخبری ݙیسوں۔ انہاں آکھیے جو میں سیاست اچ انصاف دی جدوجہد دا عزم ڳھن تے آیاں، قانون دی حکمرانی، غریباں کو سوکھا جیوݨ ݙیوݨ ترجیح اے، ایں ملک اچ نظریہ ضرورت دی کوئی ڄاہ کائنی، ساݙی حکومت عدلیہ، نیب سودھا کہیں وی ادارے دے نظام اچ مداخلت نئیں کریندی، ملک لٹݨ اتے کرپٹ نظام توں فیدے چاوݨ آلا مافیا قانون دی بالا دستی نئیں چاہندا اتے جمہوری دے اݙ اچ ہر قسم دے حربے استعمال کریندا پئے، انہاں مافیاز اتے سٹیٹس کو دا مقابلہ کرتے جیت تے ݙکھیساں ٻس عوام میݙا ہتھ ونݙاون۔ وزیراعظم عمران خان آکھیے جو طاقتور طبقہ کوں قانون دے تابع کرݨ جہاد دے برابر اے، ملک اچ قانون دی حکمرانی اتے فلاحی ریاست سانڳے جدوجہد جاری رکھیسوں، قانون دی بالا دستی دے بغیر کوئی معاشرہ ترقی نئیں کرسڳدا۔ انہاں آکھیا جو ریاست مدینہ  منورہ اچ قانون دی حکمرانی دا اصول ہا تہوں او انسانیت کیتے ہک مثالی معاشرہ ٻݨیے، تاریخ اچ انہان قوماں دا ناں نشان کائنی جئیں قانون دی حکمرانی نہ ݙتی، جتھاں حکمران ہی ملک لٹݨ شروع کر ݙیون اور ملک کیویں ترقی کرے؟ ہمیشہ غریب ملکاں اچ طاقتور حکمران کرپشن اتے منی لانڈرنگ اچ ملوث رہین جتھاں سالانہ  تقریبا ہک ہزار ارب ڈالر منی لانڈرنگ تھیندی اے، ترقی  یافتہ ممالک دی ترقی دا راز قانون دی بالا دستی اے جیندے کیتے پاکستان تحریک انصاف اپݨیاں کوششاں جاری رکھیسی۔ وزیراعظم ولدا ݙتا جو اڄوکی حکومت مسلہ کشمیر کوں ڄڳ اچ نویں سنڄاݨ ݙتی اے، ساݙی کامیاب خارجہ پالیسی پاروں بھارت دی ہندوتوا اتے آر ایس ایس دا نظریہ بے نقاب تھئے اتےھ اڄ پورا ڄق کشمیریاں دے نال کھڑے، بھارت نال کشمیر دی حیثیت بحال کرݨ تئیں کوئی مذاکرات نہ کریسوں۔ وزیراعظم آکھیا جو غیر ملکی سفارتخانیاں اتے دفتر خارجہ کشمیر کیتے وݙا چنڳاں کم کیتے، ہر سفارتخانے دا آن لائن نظام ہووݨا چاہیدے تاں جو سمندر پار پاکستانیاں دے مسلے فوری حل تھیون۔ انہاں آکھیا جو اپݨا کاروبار، اپݨا ڳھر اتے اپݨی کار کیتے مدد سانڳے بنکاں کوں نظام سوکھا کرݨ دی ہدایت کیتی اے، ایویں کساناں کیتے کسان کارڈ اتے شہریاں کیتے صحت کارݙ متعارف کرائن، تعمیراتی شعبے کیتے ٹیکس مراعات ݙتن، احساس سماجی پروگرام وی کامیابی نال چلدا پئے جیکوں جڳ اچ پذیرائی ملدی پئی اے۔ کابینہ بارے وزیراعظم آکھیا جو ہر کھلاڑی سپر سٹار نئیں ہوندا کڄھ وزرا چنڳاں کم کریندے پین جیڑھے چنڳاں کم نہ کریسن انہاں کوں بدلݨا پوسی۔ وزیراعظم آکھیے جیکر اساں کہیں نال نا انصافی کیتی اے تاں او عدالت ونڄ سڳدے، قبضہ مافیا کوں نہ چھڑیسوں، ایں سانڳے اصلاحات کریندے پئے ہیں۔ انہاں آکھیا جو پاک افغان سرحد تے باڑ لڳݨ نال امن و امان دے مسلے حل تھین بھل مقامی لوکاں دا روزگار وی متاثر تھئے این سانڳے اساں انہاں کیتے بارڈر مارکیٹاں بݨیدے پئے ہیں تاں جو او سمگلنگ دی بجائے تجارت نال اپݨا روزگار کماون۔ وزیراعظم عمران خان آکھیے جو چینی مافیا کوں کہیں صورت  این آر او نہ ݙتا ویسی، شوگر ملز مالکان کوں عوام دیاں جیباں تے ڈاکہ نا سٹݨ ݙیسوں۔ وزیراعظم آکھیا جو ملک اچ ساریاں شوگر ملاں طبقہ دیاں ہین جیڑھے ہک کارٹل بݨا ڳھندن اتے اپݨے مفادات کیتے کٹھے تھی ویندن۔ وزیراعظم یقین ݙیوایا جو چینی دے معاملے اچ تحقیقات کیتے کہیں نال نا انصافی نہ تھیسی بھل ملوث عناصر کوئی وی رعایت وی نہ ݙتی ویسی۔ وزیراعظم آکھیا جو میݙیا تے تنقید کرݨ الیاں کوں آہداں جو مہانگ صرف پاکستان اچ نئیں پورے جڳ اچ اے مسلہ اے، مہانگ مکاوݨ کیتے شوکت ترین کوں ٹاسک ݙتے جیندے کیتے حکومت اقدامات کریندی پئی اے، اساں سعودی عرب، یو اے ای ، چین اتے اوورسیز پاکستانیان پاروں ݙیوالے تھیوݨ توں بچ ڳئے ہیں، اڄ غیر ملکی زر مبادلہ دے ذخائر پورے 10 مہینے توں سرپلس ہین، سالانہ خسارہ ڳھٹیے، قرض دیاں قسطاں نہ ݙیوݨا ہوندیاں تاں اج حالات ٻئے وی چنڳے ہوندے، ملک اچ پیسہ آندا پئے تاں ہی وپار ترقی کریندا پئے، سٹاک ایکسچینج ودھدی پئی اے۔