اسلام آباد۔2فروری (اے پی پی):وزیر خارجہ مخدوم شاہ محمود قریشی آکھیے جو پاکستان دے سفارتی طور تے کلھا تھیوݨ دا تاثردرست کائنی ، اساکوں حکومت ملی تاں پاکستان دیوالیہ تھیوݨ دے نیڑے ہئی ۔ایجھے ویلھے دوست ماک اساں نال تعاون نہ کریندے تاں صورتحال مختلف ہوندی ، خارجہ پالیسی کوں سیاسی اتے معاشی صورت حال توں انجھ تھی تے نی ݙٹھا ونڄ سڳدا ، ملک اچ سیاسی عدم استحکام دی فضا پیدا کرݨ آلیاں طاقتاں سفارتی محاذ تے پاکستان کوں اوکھ توں ݙوچار کریندیاں پئن ، معاشی سفارتکاری توں براعظم افریقہ کیتے برآمدات اچ ست فیصد ودھارا تھئے ،افغانستان دی حکومت خود اعتراف کریندی پئی اے جو پاکستان امن کوششاں اچ انہاں نال تعاون کریندا پئے ، بائیڈن انتظامیہ اتے پاکستان دے نقطہ نظر اچ افغانستان دے حوالے نال یکسانیت پاتی ویندی اے ،ایران دے نال ݙو پاسے تعلقات اچ بہتری آئی اے، چین دے نال اساݙے تعلقات مزید ودھدے ویندن ، سعودی عرب نال اساݙے بھرپی آلے تعلقات ہن تے رہسن، اساݙا معاہدہ مخصوص مدت کیتے ہئی ، زرمبادلہ دے ذخائر بہتر تھئے تاں اینکوں رقم واپس کرݙتی ، متحدہ عرب امارات واضح کیتے جو بھارت دے نال انہاں دے تعلقات پاکستان دی قیمت تے نہ تھیسن ، بھارتی حکومت دی ہندوتوا سوچ خطے کوں خطرے توں ݙوچار کرݙتے ، ہندوستان بلوچستان اچ دہشت گردی دی پشت پناہی کریندا پئے ، ہندوستان ولوں پاکستان دی سرحدی حدود دی مسلسل خلاف ورزیاں دا معاملہ عالمی سطح تے چاتے ، سرحدی علاقیں اچ رہݨ آلے شہریاں کیتے بنکرز بݨائے ویسن ، مسلسل ٻارھاں ٻارحاں سال کشمیر کمیٹی دی سربراہی کرݨ آلیں مسئلہ کشمیر دے حوالے نال چپ ہن ، گزریل حکومت دے حلق اچ کشمیر دا لفظ اٹک ویندا ہئی ، ہاساں مسئلہ کشمیر کوں پوری دنیا اچ چنڳے طریقے نال چاتے ، کوئی مائی دا لعل کشمیر دا سودا نی کرسڳدا ۔اپݨے ہک بیان اچ وزیر خارجہ آکھیے جو خارجہ پالیسی دے اثرات ݙورس ہوندن اے ݙیکھݨ دی لوڑھ اے جو سفارتی محاز تے پیش آندے چیلنجز کیا پچھلے ڈھائی دے ہن یا ایندے توں پہلے دے ہن ۔
