بیجنگ ۔ 17 مارچ (اے پی پی) صدر مملکت ڈاکٹر عارف علوی چین دے وزیر اعظم لی کی چیانگ نال ملاقات اچ کرونا وبا دے خلاف چین نال پوری یکجہتی تے پاکستان ولوں حمایت دا اظہار کیتے ۔ڈوہیں رہنماواں وچال ملاقات بیجنگ دے گریٹ ہال اچ تھئی ۔ صدر مملکت ایں موقع تے آکھیا جو پاکستان اتے چین ہر آزمائش تے پورے لہنڑ آلے یار ہن جیرھے ہمیشہ ہک ڈوجھے نال کھڑن ۔ڈوہیں ملکاں دے تعلقات سانجھے اعتماد تے مفید تعاون تے مبنی ہن۔ انہاںآکھیے جو پاکستان چین دنیا کوں ڈسائے جو او بقائے باہمی اتے عدم مداخلت تے یقین رکھیندن ۔ صدر مملکت آکھیا جو پاکستان ہمیشہ اوکھے ویلھے چین دا ساتھ ڈتے تے کرونا نال نبڑنڑ دے چیلنج اچ وی ایندی حمایت جاری رکھیسی ۔ایں موقع تے چینی وزیراعظم صدر مملکت تے انہاں دے وفد دا خیر مقدم کریندے ہوئیں آکھیے جو چین تے پاکستان دی یاری ویلھے نال مضبوط تھئی اے ۔انہاں آکھیے جو چین اچ کرونا وائرس پاروں پیدا تھیونڑ آلی وبا تے وزیراعظم عمران خان تے پاکستان دی حکومت چین کیتے اظہار ہمدردی دے سنھیے بھیجے پاکستان چین کوں طبی امداد وی ڈتی ۔ اساں چین اچ پاکستان دے خیر سگالی جذبے تے شکر گزار ہوں۔ چینی وزیر اعظم آکھیے جو چین سمجھدے جو پاکستان اچ وی کرونا وائرس دے کجھ کیس ظاہر تھئن جیں پاروں حکومت پاکستان اقدامات کریندی پئی اے ۔اساکوں ایجھے چیلنجز نال سانجھے طور تے نبڑنڑ کیتے اپنڑے تعاون کوں ودھاونڑ دی ضرورت اے ۔ایں حوالے نال پاکستان نال رل تے کم کرنڑ چاہندوں ۔ ایں موقع تے وزیر خارجہ شاہ محمود قریشی، وفاقی وزیر منصوبہ بندی، ترقی واصلاحات اسد عمر، چین دے وزیر خارجہ، چین اچ پاکستانی سفیر تے بئے سینئر حکام موجود ہن ۔
صدر مملکت ڈاکٹر عارف علوی دی چین دے وزیر اعظم نال ملاقات
مضمون کا ماخذ : امکان ہے کہ میگا سینا
متعلقہ مضامین
